ի դէմս Հօր Աստուծոյ
Կարգաւորութիւն հասարակաց աղօթից Հայաստանեայց Եկեղեցւոյ, որ կատարի ի մէջ գիշերի՝ ի դէմս Հօր Աստուծոյ
Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս Քո:
Օրհնեալ համագոյ եւ միասնական անբաժանելի Սուրբ Երրորդութիւնն՝ Հայր եւ Որդի եւ Հոգի Սուրբ, այժմ եւ միշտ եւ յաւիտեանս յաւիտենից. ամէն:
Տէ՛ր, զի՜ բազում եղեն նեղիչք իմ, եւ բազումք յարեան ի վերայ իմ:
Բազումք ասէին զանձնէ իմմէ, թէ՝ «Չիք փրկութիւն սորա առ Աստուած իւր»:
Այլ Դու, Տէ՛ր, օգնական իմ ես, փառք իմ եւ բարձրացուցիչ գլխոյ իմոյ:
Ձայնիւ իմով ես առ Տէր կարդացի, եւ լուաւ ինձ ի լեռնէ սրբոյ Իւրմէ:
Ես ննջեցի եւ ի քուն եղէ, զարթեայ, եւ Տէր ընդունելի իմ է:
Ոչ երկեայց ես ի բիւրաւոր զօրաց նոցա, ոյք շուրջանակի պատեալ պաշարեալ պահէին զիս:
Արի՛, Տէ՛ր, եւ փրկեա՛ զիս, Աստուա՛ծ իմ. զի Դու հարեր զամենեսեան, ոյք էին ընդ իս թշնամութեամբ ի տարապարտուց, եւ զատամունս մեղաւորաց փշրեսցես:
Տեառնդ է փրկութիւն, ի վերայ ժողովրդեան Քո՝ օրհնութիւն Քո:
Տէ՛ր Աստուած փրկութեան իմոյ, ի տուէ կարդացի եւ ի գիշերի առաջի Քո:
Մտցեն աղօթք իմ առաջի Քո, Տէ՛ր, խոնարհեսցի ունկն Քո ի խնդրուածս իմ,
Զի լցաւ չարչարանօք անձն իմ, եւ կեանք իմ ի դժոխս մերձեցան, եւ համարեցայ ես ընդ այնոսիկ, որք իջանեն ի գուբ:
Եղէ ես որպէս մարդ առանց օգնականի եւ ի մեռեալս ազատ:
Որպէս զվիրաւորս, որք ննջեն ի գերեզմանի:
Զորս Դու ոչ յիշեցեր, նոքա ի ձեռանէ Քումմէ մերժեցան:
Եդին զիս ի գբի ներքնումն՝ ի խաւարի եւ ի ստուերս մահու:
Յիս հաստատեցաւ սրտմտութիւն Քո, զամենայն զբօսանս Քո ածեր ի վերայ իմ:
Հեռի արարեր յինէն զծանօթս իմ, եւ եդին զիս նշաւակ իւրեանց:
Մատնեցայ եւ ոչ ելանէի, աչք իմ տկարացան յաղքատութենէ:
Աղաղակեցի առ Տէր զօրհանապազ եւ համբարձի առ Քեզ զձեռս իմ:
Մի՞թէ մեռելոց առնիցես զսքանչելիս Քո, կամ բժիշկք յարուցեալ խոստովան առնիցի՞ն առ Քեզ:
Մի՞թէ պատմեսցէ ոք երբեք ի գերեզմանի զողորմութիւնս Քո կամ զճշմարտութիւնս Քո` ի կորստեան:
Մի՞թէ ճանաչիցին ի խաւարի սքանչելիք Քո, կամ արդարութիւն Քո` յերկիր մոռացեալ:
Ես առ Քեզ, Տէ՛ր, աղաղակեցի. առաւօտու աղօթք իմ ժամանեսցեն առ Քեզ:
Ընդէ՞ր, Տէ՛ր, մերժես զանձն իմ կամ դարձուցանես զերեսս Քո յինէն:
Տնանկ եւ վաստակաւոր եմ ես ի մանկութենէ իմմէ. ի բարձրութենէ խոնարհեցայ եւ ապշեցայ:
Յիս հաստատեցաւ բարկութիւն Քո, արհաւիրք Քո խռովեցուցին զիս,
Շրջեցան զինեւ որպէս ջուր, զօր ամենայն պաշարեցին զիս ի միասին:
Հեռի արարեր յինէն զբարեկամս իմ եւ զծանօթս իմ վասն թշուառութեան իմոյ:
Օրհնեա՛, ա՛նձն իմ, զՏէր, եւ ամենայն ոսկերք իմ՝ զանուն սուրբ Նորա:
Օրհնեա՛, ա՛նձն իմ, զՏէր եւ մի՛ մոռանար զամենայն տուրս Նորա.
Ո քաւէ զմեղս քո, բժշկէ զամենայն հիւանդութիւնս քո.
Ո փրկէ յապականութենէ զկեանս քո, պսակէ զքեզ ողորմութեամբ եւ գթութեամբ.
Ո լնու ի բարութենէ զցանկութիւն քո, նորոգեսցի որպէս արծուոյ մանկութիւն քո:
Առնէ ողորմութիւնս Տէր եւ իրաւունս ամենայն զրկելոց:
Եցոյց Տէր զճանապարհս Իւր Մովսիսի եւ որդւոցն Իսրայելի զկամս Իւր:
Գթած, ողորմած է Տէր, երկայնամիտ եւ բազումողորմ:
Ոչ ի սպառ բարկանայ Տէր եւ ոչ յաւիտեան պահէ ոխս:
Ոչ ըստ մեղաց մերոց արար մեզ եւ ոչ ըստ անօրէնութեան մերում հատոյց մեզ.
Այլ որպէս բարձր են երկինք յերկրէ, այնպէս զօրացոյց Տէր զողորմութիւն Իւր ի վերայ երկիւղածաց Իւրոց:
Որչափ հեռի են արեւելք յարեւմտից, այնչափ հեռի արար ի մէնջ զանօրէնութիւնս մեր:
Որպէս գթայ հայր ի վերայ որդւոց իւրոց, այնպէս գթասցի Տէր յերկիւղածս Իւր.
Զի Նա գիտաց զստեղծուածս մեր եւ յիշեաց, թէ հող եմք:
Մարդոյ որպէս խոտոյ են աւուրք իւր, որպէս ծաղիկ վայրի՝ այնպէս ծաղկէ:
Շնչէ ի նմա հողմ, եւ ոչ է, եւ ոչ եւս երեւի տեղի նորա:
Բայց ողորմութիւն Տեառն յաւիտեանս յաւիտենից ի վերայ երկիւղածաց Իւրոց, եւ արդարութիւն Նորա յորդւոց մինչեւ յորդիս,
Ոյք պահեն զուխտս Նորա, յիշեն զպատուիրանս Նորա եւ առնեն զնա:
Տէր յերկինս պատրաստեաց զաթոռ Իւր, արքայութիւն Նորա ամենեցուն տիրէ:
Օրհնեցէ՛ք զՏէր, ամենայն հրեշտա՛կք Նորա՝ հզօրք զօրութեամբ, ոյք առնէք զբան Նորա ի լսել ձայնի պատգամաց Նորա:
Օրհնեցէ՛ք զՏէր, ամենայն զօրութի՛ւնք Նորա, պաշտօնեա՛յք եւ արարո՛ղք կամաց Նորա:
Օրհնեցէ՛ք զՏէր, ամենայն գո՛րծք Նորա. զի ընդ ամենայն տեղիս է տէրութիւն Նորա. օրհնեա՛, ա՛նձն իմ, զՏէր:
Տէ՛ր, լո՛ւր աղօթից իմոց, ո՛ւնկն դիր խնդրուածաց իմոց ճշմարտութեամբ Քով:
Լո՛ւր ինձ արդարութեամբ Քով եւ մի՛ մտաներ ի դատաստան ընդ ծառայի Քում, զի ոչ արդարանայ առաջի Քո ամենայն կենդանի:
Հալածեաց թշնամին զանձն իմ, խոնարհ արար յերկիր զկեանս իմ եւ նստոյց զիս ի խաւարի որպէս մեռեալ յաւիտենից:
Ձանձրացաւ յիս հոգի իմ, եւ սիրտ իմ խռովեցաւ յիս:
Յիշեցի զաւուրսն զառաջինս, խորհեցայ յամենայն գործս Քո. յարարածս ձեռաց Քոց խորհեցայ եւ համբարձի առ Քեզ զձեռս իմ:
Անձն իմ որպէս զերկիր ծարաւի է առ Քեզ. վաղվաղակի լո՛ւր ինձ, Տէ՛ր, զի նուաղեաց յինէն հոգի իմ:
Մի՛ դարձուցաներ զերեսս Քո յինէն. նմանիցեմ այնոցիկ, ոյք իջանեն ի գուբ:
Լսելի՛ արա ինձ առաւօտու զողորմութիւնս Քո, զի ես ի Քեզ, Տէ՛ր, յուսացայ:
Ցո՛յց ինձ ճանապարհ, յոր եւ գնացից, զի առ Քեզ, Տէ՛ր, համբարձի զանձն իմ:
Փրկեա՛ զիս ի թշնամեաց իմոց, Տէ՛ր, զի զՔեզ ապաւէն ինձ արարի:
Ուսո՛ ինձ առնել զկամս Քո, զի Դու ես Աստուած իմ:
Հոգի Քո բարի առաջնորդեսցէ ինձ յերկիր ուղիղ:
Վասն անուան Քո, Տէ՛ր, կեցուսցես զիս, արդարութեամբ Քով հանցես ի նեղութենէ զանձն իմ:
Ողորմութեամբ Քով սատակեա՛ զթշնամիս իմ եւ կորո՛ զամենայն նեղիչս անձին իմոյ, զի ես ծառայ Քո եմ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Յիշեսցուք ի գիշերի զանուն Քո, Տէ՛ր:
Բղխեսցեն սիրտք մեր զբան բարի, եւ լեզուք մեր պատմեսցեն զգործս երկնաւոր Թագաւորիդ:
Ի մէջ գիշերի յարուցեալ՝ խոստովանեսցուք զՔեզ, Տէ՛ր:
Զաղօթս մեր տացուք Քեզ, Տէ՛ր, ի գաւիթս Քո ի մէջ նոր Երուսաղեմի:
Ի գիշերի համբարձցուք զձեռս մեր սրբութեամբ առ Քեզ, Տէ՛ր:
Ի ձայն գոհութեան, ամենա՛յն հոգիք, օրհնեցէ՛ք զՏէր:
Փոխ.
Զարթի՛ք, փա՛ռք իմ, զարթի՛ք, եւ ես զարթեայց առաւօտուց. ալէլուիա:
Զարթի՛ք ընդ զուարթունս, մանկու՛նք վերինն Սիոնի. ալէլուիա:
Զարթի՛ք, որդի՛ք լուսոյ, ի յօրհնութիւն Հօրն լուսոյ. ալէլուիա:
Զարթի՛ք, փրկեա՛լք արեամբ, եւ տո՛ւք զփառս Փրկողին. ալէլուիա:
Զարթի՛ք, նո՛ր ժողովուրդք՝ նոր երգս առեալ Նորոգողին. ալէլուիա:
Զարթի՛ք, հարսո՛ւնք հոգւով՝ սպասեալք գալոյ սուրբ Փեսային. ալէլուիա:
Զարթի՛ք, վառեա՛լք լուսով, ըստ իմաստուն սուրբ կուսանացն. ալէլուիա:
Զարթի՛ք, պատրաստեցէ՛ք իւղ լապտերաց ջերմ արտասուս. ալէլուիա:
Զարթի՛ք եւ մի՛ ննջէք, նման յիմար կուսից նիրհէք. ալէլուիա:
Զարթի՛ք, երկիր պագցուք եւ արտասուօք զայս ասասցուք. ալէլուիա:
Փոխ.
Զարթի՛ր, ընդէ՞ր ննջես, Տէ՛ր, մի՛ մերժեր զմեզ ի սպառ:
Արի՛, Տէ՛ր, օգնեա՛ մեզ. տացուք անուանդ Քում զփառս:
Այժմ եւ յաւէտ Հօր եւ Որդւոյ եւ Սուրբ Հոգւոյն. ամէն:
Փոխ.
Զարթուցեալքս ի զբաղմանէ գիշերային հանգստենէ:
Շնորհեսցէ մեզ մարդասէր Տէր մխիթարութիւն եւ ի սփոփանս Եկեղեցւոյ:
Ահիւ եւ դողութեամբ կացցուք ի յաղօթս:
Եկեալ խոստովանեսցուք զյանցանս:
Եւ գտցուք ի Քրիստոսէ զքաւութիւն եւ զմեծ զողորմութիւն:
Կցորդ.
Անբաժանելի եւ համագոյ Երրորդութեանդ, համաձայնեալք ընդ զօրս երկնից, փառս մատուցանեմք:
Փա՜ռք Քեզ, որ յանարուեստ յաթոռ բարձրացեալ՝ հանգչիս, սո՛ւրբ Աստուած՝ հզօր եւ սքանչելագործ:
Փա՜ռք Քեզ, որ յանէից գոյացուցեր զամենայն արարածս, սո՛ւրբ Աստուած՝ անճառ Հօր անեղ Որդի:
Փա՜ռք Քեզ, որ տեսչութեամբ խնամես զամենայն արարածս, սո՛ւրբ Աստուած՝ Բղխումն անսպառ աղբեր:
Տէ՛ր, ժողովրդապետք Եկեղեցւոյ ի Քէն հայցեն՝ ասելով. «Հովի՛ւ բարի, ողորմեա՛ բանաւոր հօտի»:
Ամէն. ալէլուիա, ալէլուիա, ալէլուիա:
Ամէն. ալէլուիա, ալէլուիա, ալէլուիա:
Զարթուցեալքս ամենեքեան ի հանգստենէ քնոյ, զոր շնորհեաց մեզ մարդասէրն Աստուած ի մխիթարութիւն եւ ի սփոփանս տկարութեան մերում, եւ եկեալքս միաբան հոգեւոր երգով ի փառաբանութիւն եւ ի պատիւ ամենասուրբ անուան Տեառն մերոյ եւ Փրկչին Յիսուսի Քրիստոսի՝ ահիւ եւ դողութեամբ կացցուք յաղօթս առաջի Նորա: Եւ գոհացարուք զՆմանէ ի գիշերային ժամուս յայսմիկ վասն իրաւանց եւ արդարութեան Նորա. որ ընտրեաց զմեզ ողորմութեամբն Իւրով եւ շնորհեաց մեզ բերել զնմանութիւն երկնային հրեշտակացն ի փառաբանիչս Տեառն Աստուծոյ ամենեցուն եւ մեզ լինիլ: Եւ մեք, այսուհետեւ սրբելով զանձինս մեր ի խղճէ եւ ի չար գործոց, համբարձցուք զձեռս մեր ի սրբութիւն առանց բարկութեան եւ երկմտութեան: Հաւատով խնդրեսցուք ի Նմանէ զքաւութիւն եւ զթողութիւն յանցանաց մերոց՝ խոստովան լինելով զգաղտնիս սրտից մերոց ծածկագիտին Աստուծոյ: Որպէս զի ընդունելով զպաղատանս մեր աղօթիւք եւ բարեխօսութեամբ ամենայն սրբոց՝ շնորհեսցէ մեզ մարդասէրն Աստուած կեալ առաքինութեամբ եւ անարատ վարուք ըստ կամաց Նորա յայսմ աշխարհիս եւ արժանաւոր լինելով յաւիտենական եւ երկնային խորանացն, զոր խոստացաւ սիրելեաց Իւրոց ճշմարիտն Աստուած Յիսուս Քրիստոս: Տէ՛ր մեր, կեցո՛ եւ ողորմեա՛:
Կեցո՛, Տէ՛ր:
Զմնացուած գիշերիս խաղաղութեամբ անցուցանել՝ հաւատով ի Տեառնէ խնդրեսցուք:
Շնորհեա՛, Տէ՛ր:
Զհրեշտակ խաղաղութեան՝ պահապան անձանց մերոց ի Տեառնէ խնդրեսցուք:
Շնորհեա՛, Տէ՛ր:
Զքաւութիւն եւ զթողութիւն յանցանաց մերոց ի Տեառնէ խնդրեսցուք:
Շնորհեա՛, Տէ՛ր:
Զսրբոյ խաչին մեծ եւ կարող զօրութիւն յօգնութիւն անձանց մերոց ի Տեառնէ խնդրեսցուք:
Շնորհեա՛, Տէ՛ր:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
ՈՂԲԵՐԳՈՒԹԻՒՆ ԱՆՁԻՆ ԶՂՋԱՑԵԼՈՅ տեառն Ներսեսի Հայոց կաթողիկոսի
Աշխա՛րհ ամենայն, առ իս նայեցեալ՝ ախտակի՛ց լերուք:
Բանամ զշրթունս, բարբառիմ լեզուաւս, բողոքեմ զանձնէս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Գող եղէ մեղաց, գտող կորստեան, գուբ ինձ փորեցի:
Դաւեցի զանձն իմ, դաւաճանեցի, դարան գործեցի.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Երբեմն էի լոյս. եւ այժմ եմ խաւար եւ ստուեր մահու:
Զիա՞րդ պատմեցից զթիւ մեղաց իմոց, զի բազում են յոյժ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Էրկի՛նք եւ երկի՛ր, էկայք ողբացէ՛ք էղկելի զանձն իմ:
Ընտրեցի զչարն, ընկալայ կամաւ ըզհոյլս մեղաց.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Թաթաւիմ տղմով, թաւալիմ ի մեղս. թօթափիլ չկարեմ:
Ժանտ ախտիւ լցեալ՝ ժահահոտ եղէ ժամանակս բազումս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ի բաց մեկնեցայ ի սուրբ խորհրդոց, ի բարեաց գործոց:
Լաւ վարկաւ անձն իմ լուսոյն հեռանալ, լինել ընդ խաւար.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Խորհուրդք չարին խաբեն զհոգիս, խորասոյզ առնեն:
Ծածկեն անդնդօք, ծիծաղին գլորմամբս, ծանակ զիս առնեն.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Կամաւ կորացայ կարկամեալ անձամբս. կանգնիլ ոչ կարեմ:
Հուր մեղաց կիզող հրդեհեաց որ յիս հոգեւոր բարիս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ձաղկեցայ մեղօք, ձաղեցին տեսողք, ձանձրացաւ հոգիս:
Ղեղի դառնութեան, ղօղեալ ի սիրտ իմ, ղամբար իմ շիջաւ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ճաշակմամբ մեղաց ճաշեցի զմահ, ճոխս աղքատացայ:
Մեռեալ եմ հոգւովս, մոլորեալ՝ մտօքս, միայն կամ մարմնովս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Յորոգայթ մահու յորսողին անկայ, յաղթեցայ յախտից:
Նետից թշնամւոյն նշաւակ եղէ. նոր միշտ խոցոտիմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Շուրջ պատեալ զինեւ շունք բազումք եղեն. շաղախին արեամբս:
Որս եղէ չարին. ուռկանաւ մեղաց որսացաւ զանձն իմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Չարաչար վշտօք չարչարի անձն իմ. չունիմ դադարումն:
Պարտապան գտայ պարտուց յանցանաց պարտեալս ի մեղաց.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ջանամ զղջանալ, ջեռանիմ դարձեալ, ջեռնում հրով մեղաց:
Ռաբբի կոչեցայ, ռակայ անուանիմ ռամկական վարուքս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սիրով ցանկութեան սաստիկ բարկութեան սիրտ իմ խոցեալ է:
Վիրօք յանցանաց վշտանայ հոգիս. վարանեալ շրջիմ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Տիրեցին ինձ չարք. տարագիր հանին տիրական գրկացն:
Րաբունւոյն բարւոյ րախճական ձայնին րոտինս ոչ լուայ.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Ցանկութիւն չարեաց ցանկալի դիմօք ցաւեցոյց զաչս իմ:
Ււրաքանչիւրոց ւիւսմամբ խուռն ախտից ւիւծեալ է հոգիս.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Փութացի՛ր, ա՛նձն իմ, փախչիլ ի չարեաց, փափագիլ բարեաց:
Քեզ միշտ մե՛րձ ծանիր քուն մահու եկեալ քննող Դատաւոր.
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
Սրբուհւոյ Աստուածածնին բարեխօսութեամբ յիշեա՛, Տէ՛ր, եւ ողորմեա՛:
ԱՂՕԹՔ
ԶՔէն գոհանամք, Տէր Աստուա՛ծ մեր, որ շնորհեցեր մեզ հանգիստ քնոյ խաղաղութեամբ: Եւ զարթուցեալ ժամանեցուցեր զմեզ կանխել յերկրպագութիւն ահաւոր եւ փառաւորեալ անուանդ Քում սրբոյ: Տո՛ւր մեզ, Տէ՛ր, աղաչեմք զՔեզ, զմնացուած գիշերիս խաղաղութեամբ անցուցանել. եւ զամենայն ժամանակս կենաց պանդխտութեան մերոյ երկիւղիւդ Քո ամրացո՛ եւ պահեա՛: Որպէս զի զգուշութեամբ եւ անարատ վարուք կրօնաւորեալք յայսմ աշխարհիս՝ ժամանեսցուք յանքոյթ եւ ի խաղաղ նաւահանգիստ յաւիտենական ի կեանսդ՝ շնորհօք եւ մարդասիրութեամբ Տեառն մերոյ եւ Փրկչին Յիսուսի Քրիստոսի: Ընդ Որում Քեզ Հօր եւ Հոգւոյդ Սրբոյ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:
Խաղաղութի՜ւն ամենեցուն: Աստուծոյ երկրպագեսցուք:
Նայեա՛ց, Տէ՛ր բարերար, ողորմութեամբ Քով յերկրպագուս եւ ի փառաբանիչս անուանդ Քում սրբոյ: Տէ՛ր զօրութեանց, խաղաղացո՛ զանձինս մեր յամենայն սատանայական խռովութեանց եւ յաշխարհական զբօսանաց: Զհրեշտակ խաղաղութեան Քո առաքեա՛ առ մեզ, որ եկեալ պահեսցէ զմեզ անխռովս ի տուէ եւ ի գիշերի, յարթնութեան եւ ի հանգստեան մերում: Որպէս զի բարեպաշտութեամբ եւ արժանաւորապէս Քեզ Տեառնդ ծառայելով ի կեանս յայսոսիկ՝ ժամանեսցուք յաւիտենական երկնից արքայութեան Քո, զոր պատրաստեցեր ի սկզբանէ աշխարհի սրբոց Քոց: Եւ ընդ նոսին գոհանալով փառաւորեսցուք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից:
Օրհնեալ Տէր մեր Յիսուս Քրիստոս. ամէն:
Ալէլուիա, ալէլուիա:
(սաղմոս ՃԶ-ՃԺԸ)
Համբարձաւ Աստուած օրհնութեամբ, եւ Տէր մեր՝ ձայնիւ փողոյ:
Արարի իրաւունս եւ արդարութիւն. ալէլուիա. մի՛ մատներ զիս ի ձեռս նեղչաց իմոց. ալէլուիա:
Ընկա՛լ զծառայս Քո ի բարի, զի մի՛ ամբարտաւանք զզուեսցեն զիս:
Սպասեցին աչք իմ փրկութեան Քում, Տէ՛ր, եւ բանից արդարութեան Քո:
Արա՛ ընդ ծառայի Քում, Տէ՛ր, ըստ ողորմութեան Քում. զարդարութիւնս Քո ուսո՛ ինձ:
Ծառայ Քո եմ ես. իմաստո՛ւն արա զիս, եւ ծանեայց զվկայութիւնս Քո:
Ժամ է պաշտել զՏէր. խափանեցին զօրէնս Քո:
Փոխ.
Մերձեսցին խնդրուածք իմ առաջի Քո, Տէ՛ր. ըստ բանի Քում իմաստո՛ւն արա զիս. ալէլուիա, ալէլուիա:
Մտցեն աղօթք իմ առաջի Քո, Տէ՛ր, եւ բանիւ Քով փրկեա՛ զիս:
Բղխեսցեն շրթունք իմ զօրհնութիւնս Քո, յորժամ ուսուսցես ինձ զարդարութիւնս Քո:
Խօսեսցի լեզու իմ զբանս Քո, զի ամենայն պատուիրանք Քո արդարութեամբ են:
Եղիցի ձեռն Քո ի կեցուցանել զիս, զի զպատուիրանս Քո ընտրեցի:
Ցանկացայ փրկութեան Քում, Տէ՛ր, եւ օրէնք Քո խօսք իմ էին:
Կեցցէ անձն իմ, օրհնեսցէ զՔեզ, եւ իրաւունք Քո օգնեսցեն ինձ:
Մոլորեցայ ես որպէս զոչխար կորուսեալ. խնդրեա՛ զծառայս Քո, զի զպատուիրանս Քո ես ոչ մոռացայ:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
Ալէլուիա, ալէլուիա:
Լո՛յս ի Լուսոյ, զմեզ լուսաւորեա՛. որ փառօք Հօր հանդերձեալ ես գալ ի դատել զերկիր, արժանաւորեա՛ եւ զմեր զննջեցեալսն անճառ խոստմանց Քոց ընդ սուրբս Քո։
Հօր եւ Հոգւոյ Համագոյակի՛ց, ի տիեզերական ահեղ ատենին արժանաւորեա՛ եւ զմեր զննջեցեալսն անճառ խոստմանց Քոց ընդ սուրբս Քո։
Երկնի եւ երկրի արդար Դատաւո՛ր, յորժամ հատուցանես ըստ գործոց իւրաքանչիւրոց, արժանաւորեա՛ եւ զմեր զննջեցեալսն անճառ խոստմանց Քոց ընդ սուրբս Քո։
(Տրյ. Հանգստեան գկ. Բ.)
Որ արարիչդ ես հրեղինաց եւ հողեղինաց եւ մշտնջենաւոր փառաբանիս ի բանաւոր պաշտօնէիցս, ի Քէն հայցեմք. թողութի՛ւն շնորհեա ննջեցելոց մերոց։
Որ ի յերկրի երեւեցար եւ ընդ մարդկան բնակեցար եւ զանմահութիւն պարգեւեցեր մեզ՝ մահացելոցս, ի Քէն հայցեմք. թողութի՛ւն շնորհեա ննջեցելոց մերոց։
Յորժամ նստիս յաթոռ փառաց դատողական իշխանութեամբ եւ փառաւորես առ ի Քէն փառօք զգինս արեան Քո, Տէ՛ր, ի Քէն հայցեմք. թողութի՛ւն շնորհեա ննջեցելոց մերոց։
(Տրյ. Հանգստեան գկ. Գ., 1-2 տներ)
Որ անբաւ Քո մարդասիրութեամբդ գթացար յազգս մարդկան, ծնար ի Կուսէն, զծնեալս սուրբ աւազանաւն՝ զննջեցեալսն մեր, ընդ սուրբս Քո հանգո՛, Թագաւո՛ր յաւիտենից։
Որ ի վերայ խաչին զենար որպէս գառն եւ զմարմին եւ զարիւնդ Քո բաշխեցեր ի փրկութիւն աշխարհի, զհաղորդեալս մարմնոյ Քո եւ արեան՝ զննջեցեալսն մեր, ընդ սուրբս Քո հանգո՛, Թագաւո՛ր յաւիտենից։
(Օրհ. Մեծի պահոց Գ կիւրակէի գկ. Ա.)
Օրհնեմք զՔեզ, անսկիզբն Հա՛յր Որդւոյդ Միածնի, զՈր առաքեցեր ի դարձումն մոլորեալ ոչխարին, դարձո՛ եւ զմեզ ի մեղաց Որդւոյ Քո չարչարանօք:
Գովեմք զՔեզ, Բա՛ն եւ Լո՛յս, որ զտիրական Քո պատկեր լուսով ճրագի Քո գտեալ՝ վերականգնեցեր, կանգնեա՛ զանկեալքս մեղօք Քոյին սուրբ չարչարանօք:
Բարեբանեմք զՓառակիցդ Հօր՝ զՀոգիդ ճշմարիտ, որ նորոգեցեր զհնացեալքս մեղօք հնոյն Ադամայ. նորոգեա՛ եւ զմեզ ի մեղաց նորոգութեամբ Քո շնորհաց:
Ուրախացի՛ր, Բարձրելոյն հովանացեա՛լ զօրութեամբ եւ բնակարա՛ն Սուրբ Հոգւոյն, Որով ծնար զԲանն Աստուած. բարեխօսեա՛ վասն մեր, Աստուածածի՛ն Մարիամ:
(Ողր. ապաշխարութեան գկ. Ա.)
Քրիստոս Աստուա՛ծ աստուծոց, ողորմեա՛:
Անօրէնութեամբ ի մեղս երկնեաց զիս մայր իմ. աղաչեմ, Փրկի՛չ, ողորմեա՛:
Վիրաւորեալ մեղօք անկանիմ առ Քեզ, Փրկի՛չ. մի՛ անտես առներ, ողորմեա՛:
(Ողր. Մեծի պահոց Դ կիւրակէի գկ.)
Շնորհեա՛ մեզ, Տէ՛ր, ընդ աղքատաց օրինակին Ղազարու ժուժկալութիւն, զի կամաւոր աղքատութեամբ արքայութեանդ երկնից ընդ նմին լիցուք արժանի. լո՛ւր մեզ եւ ողորմեա՛, Քրիստո՛ս Աստուած:
Որ փոխանակ հացին կարօտութեան զհացն անմահութեան նմա շնորհեցեր եւ ընդ մեծատանն անգթութեան ի գոգն Աբրահամու զնա ընկալար, լո՛ւր մեզ եւ ողորմեա՛, Քրիստո՛ս Աստուած:
Լուսաւորեա՛ զաչս սրտից՝ ստանալ մեզ ողորմութեամբ ի Քէն, Տէ՛ր, զողորմութիւն, զի մի՛ ընդ մեծատանն հայցեսցուք ի բոց հնոցին ծագիւ մատին ջուր ի զովացումն. լո՛ւր մեզ եւ ողորմեա՛, Քրիստո՛ս Աստուած:
(Ողր. Յարութեան գկ. Գ.)
Որ տրտմահաղորդ Քո չարչարանօք խաչին ազատեցեր զմարդն ի տրտմազգեաց փայտէն եւ ի մեղսաճաշակ պտղոյն, Քրիստո՛ս Աստուած, եւ մե՛զ ողորմեա:
Որ մահուամբ Քո կենդանի եւ մեռելութեամբդ յերկրի նորոգեցեր դարձեալ զաշխարհս եւ զհողացեալ բնութիւնս, Քրիստո՛ս Աստուած, եւ մե՛զ ողորմեա:
Որ երեքօրեայ յարութեամբ Քո եւ համբարձմամբդ յերկինս վերածեր զմարդն առ կենաց փայտն եւ յանմահական ճաշակն, Քրիստո՛ս Աստուած, եւ մե՛զ ողորմեա:
(Օրհ. Հոգեգալստեան Ե աւուր գկ. Ա.)
Զանսկզբնաբար Բղխումն ի Հօրէ՝ զՀոգին ճշմարիտ, որ հնչմամբ ձայնի էջ ի վերնատունն այսօր նման սաստիկ հողմոյ, զՈր փառաւորեմք հոգեւոր երգով:
ԶՀամագոյակիցն Հօր եւ Որդւոյ՝ զԲաշխողն շնորհաց, որ ի հրեղէն լեզուս բաժանեալ զբանն ընտրութեան լեզուաց շնորհեաց սուրբ առաքելոցն, զՈր փառաւորեմք հոգեւոր երգով:
ԶԱղբիւրն իմաստութեան՝ զԿատարեալն անձնաւորութեամբ, որ խօսեցաւ յօրէնս եւ ի մարգարէս եւ յաւետարանս, զՈր փառաւորեմք հոգեւոր երգով:
(Ճշ. Աւետեաց սուրբ Աստուածածնին գկ.)
Աստուածածի՛ն, խորա՛ն Լուսոյ անվայրափակ Արփւոյն կենաց, որ եղեր արեւելք Արեգականն արդարութեան եւ նստելոցս ի խաւարի լոյս ծագեցեր. վասն որոյ ամենեքեան զքեզ միշտ մեծացուցանեմք:
Անապական տաճա՛ր եւ մորենի՛ անկիզելի, որ զանշէջ հուր Աստուածութեանն ի քեզ տարեալ կրեցեր, որով բնութեանս կիզեալ շիջաւ կրից բոց. վասն որոյ ամենեքեան զքեզ միշտ մեծացուցանեմք:
Կենդանի տապանա՛կ կտակարանաց նորոյ ուխտիս, որով ելք յերկիր աւետեաց հորդեալ Հոգւով ի քեզ տպաւորեալ Բանին. վասն որոյ ամենեքեան զքեզ միշտ մեծացուցանեմք:
(Տրյ. Խաչվերացի ուրբաթու գկ.)
Ո՛վ պահապան, որ ծագեցար յԵդեմայ՝ նշան յաղթութեան ընդդէմ աներեւոյթ թշնամւոյն:
Դու՝ փակելոյ դրախտին բացող եւ առաջնորդ աւազակին, որ զբոցեղէն սուրն կապտեաց Անեղին հրամանաւ:
Փա՜ռք Հօր եւ Որդւոյ եւ Հոգւոյն Սրբոյ:
Քեւ ցնծան ստորայինքս ամենայն ի միւսանգամ Քո գալստեանն, եւ յաւէժ զուարճանան դասք անմարմնոցն առ էիցս:
Այժմ եւ միշտ եւ յաւիտեանս յաւիտենից. ամէն:
(Տրյ. Հանգստեան գկ. Գ., 3-րդ տուն)
Որ ըստ նմանութեան մահու Քո տնկակից արարեր եւ երկնից արքայութեանդ ժառանգորդ լինել խոստացար, զհաւատացեալս գալստեան Քո, Տէ՛ր, զննջեցեալսն մեր ընդ սուրբս Քո հանգո՛, Թագաւո՛ր յաւիտենից։
(Տրյ. Հանգստեան գկ. Ա.)
Տէ՛ր, լո՛ւր աղօթից իմոց. աղաղակ իմ առ Քեզ եկեսցէ, մի՛ դարձուցաներ զերեսս Քո յինէն:
Յաւուր նեղութեան իմոյ խոնարհեցո՛ առ իս զունկն Քո. յորում աւուր կարդամ առ Քեզ, վաղվաղակի լո՛ւր ինձ:
Սպառեցան որպէս ծուխ աւուրք իմ, եւ ոսկերք իմ որպէս խռիւ չորացան:
Հարաւ որպէս խոտ եւ ցամաքեցաւ սիրտ իմ, մոռացայ ուտել զհաց իմ ի ձայնէ հեծութեան իմոյ:
Կցեցաւ ոսկր իմ ի մարմին իմ, նմանեցայ ես հաւալսան յանապատի:
Եղէ ես որպէս բու յաւերակի, տքնեցայ եւ եղէ ես որպէս ճնճղուկ միայն ի տանիս:
Նախատեցին զիս թշնամիք իմ զօրհանապազ, եւ գովիչք իմ ինեւ երդնուին:
Զմոխիր որպէս զհաց կերայ եւ զըմպելին իմ արտասուօք խառնեցի:
Յերեսաց բարկութեան սրտմտութեան Քո, զի Դու բարձրացուցեր եւ խոնարհեցուցեր զիս:
Աւուրք իմ որպէս հովանի անցին, եւ ես որպէս խոտ ցամաքեցայ:
Դու, Տէ՛ր, յաւիտեան կաս, եւ յիշատակ քո ազգէ մինչեւ յազգ:
Դու յարուցեալ գթասցիս ի վերայ Սիոնի. ժամանակ գթալոյ նորա, հասեալ է ժամ:
ԱՒԵՏԱՐԱՆ ՀԱՆԳՍՏԵԱՆ
(ԱԿ, ԳԿ)
Սրբոյ Աւետարանիս Յիսուսի Քրիստոսի, որ ըստ Ղուկասու
(գլ. 12.32-48)
Տէրն մեր Յիսուս Քրիստոս ասէ.
«Մի՛ երկնչիր, հօ՛տ փոքրիկ, զի հաճեցաւ Հայր ձեր տալ ձեզ զարքայութիւն:
Վաճառեցէ՛ք զինչս ձեր եւ տո՛ւք ողորմութիւն. եւ արարէ՛ք ձեզ քսակս առանց հնանալոյ, գանձ անպակաս յերկինս, ուր ո՛չ գող մերձենայ, եւ ո՛չ ցեց ապականէ:
Զի ուր գանձն ձեր է, անդ եւ սիրտք ձեր եղիցին:
Եղիցին գօտիք ձեր պնդեալ ընդ մէջս, եւ ճրագունք՝ լուցեալք, եւ դուք՝ նմանողք մարդկան, որ ակն ունիցին տեառն իւրեանց, թէ երբ դառնայցէ ի հարսանեաց, զի յորժամ գայցէ եւ բախիցէ, վաղվաղակի բանայցեն նմա:
Երանի իցէ ծառայիցն այնոցիկ, զորս եկեալ տէրն գտցէ արթունս. ամէն ասեմ ձեզ, զի գօտի ընդ մէջ ածցէ եւ բազմեցուսցէ զնոսա եւ անցեալ պաշտիցէ զնոսա. եւ եթէ յերկրորդ կամ յերրորդ պահու եկեսցէ եւ գտցէ այնպէս, երանելի են ծառայքն այնոքիկ:
Բայց զայն գիտասջիք. եթէ գիտէր տանուտէրն, յորում ժամու գող գայ, հսկէր եւ չտայր թոյլ ական հատանել ի տան իւրում:
Եւ դո՛ւք եղերուք պատրաստք, զի յորում ժամու ոչ կարծիցէք, գայ Որդի մարդոյ»:
Ասէ Պետրոս. «Տէր, առ մե՞զ ասացեր զառակդ զայդ, թէ՞ առ ամենեսեան»:
Եւ ասէ Տէր. «Ո՞վ իցէ հաւատարիմ տնտես եւ իմաստուն, զոր կացոյց տէր իւր ի վերայ գերդաստանի իւրոյ՝ տալ ի ժամու զկերակուրս:
Երանի իցէ ծառային այնմիկ, զոր եկեալ տէր իւր՝ գտանիցէ արարեալ այնպէս:
Արդարեւ ասեմ ձեզ, զի ի վերայ ամենայն ընչից իւրոց կացուսցէ զնա:
Ապա եթէ ասիցէ ծառայն այն ի սրտի իւրում՝ «Յամէ տէր իմ ի գալ», եւ սկսանիցի հարկանել զծառայսն եւ զաղախնայսն, ուտել եւ ըմպել եւ արբենալ, եկեսցէ տէր ծառային այնորիկ յաւուր, յորում ակն ոչ ունիցի, եւ ի ժամու, յորում ոչ գիտիցէ, ընդ մէջ կտրեսցէ զնա եւ զմասն նորա ընդ անհաւատս դիցէ:
Եւ ծառայ, որ գիտիցէ զկամս տեառն իւրոյ եւ ոչ պատրաստիցէ ըստ կամաց նորա, արբցէ գան բազում:
Եւ որ ոչն գիտիցէ եւ արժանի գանի ինչ գործիցէ, արբցէ գան սակաւ. ամենայնի, որում շատ տուաւ, շատ խնդրեսցի ի նմանէ, եւ որում բազում աւանդեցաւ, առաւել եւս պահանջեսցեն ի նմանէ»:
(ԱԿ, ԳԿ)
Ճանապա՛րհ մոլորելոց
Եւ ճառագա՛յթ խաւարելոց,
Հրաւիրեցեր զորդիս լուսոյ
Ի յերկնային հարսանիս Քո.
Ընդ զուարճալից անդ ժողովոց
Արժանացո՛ զսա դասուց,
Լի լապտերօք մո՛յծ յառագաստ
Ընդ իմաստուն սուրբ կուսանացն:
Մերով բնութեամբ, զոր զգեցար,
Ի փայտ խաչին բեւեռեցար՝
Լուծանելով զմեզ ի մեղաց
Ի նախահօրն կապանաց.
Լո՛յծ եւ զսա ի յանցանաց
Վասն Քո սուրբ չարչարանաց.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Յետ կամաւոր մահու խաչի
Եդար ի նոր գերեզմանի,
Երեքօրեայ թաղմամբ յերկրի
Նոր ստեղծեր զմեզ կենդանի.
Զիջեալս ընդ Քեզ ի հող մահու
Վերակոչեա՛ ձայնիւ փողոյ.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Նստեալ կանանցն իւղաբերից
Եւ ողբային արտասուալից
Իբր զմեռեալ անյուսալից
ԶԿենդանիդ յաւիտենից.
Վասն նոցին սուրբ արտասուաց
Մաքրեա՛ զսա ի յանցանաց.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Շարժեալ հիմանցն դժոխոց
Ի տեսանել զՔեզ ներքնոց՝
Հաներ զհոգիսն, որ ի բանտին՝
Կապեալ զիշխանն մահածին.
Ընդ հանգուցեալ հոգիս սրբոց
Հանգո՛ զհոգիս ննջեցելոց.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Ուրախութեամբ զօրք երկնային
Յերկնից յերկիր իջանէին,
Յորժամ յարեար ի մեռելոց,
Լոյս ծագեցար արարածոց.
Սուրբ յարութեամբ Քով կենարար
Յարո՛ զսա ի կեանս անմահ.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Չհանդուրժեալ պահապանացն
Ի յերկիւղէ երկնաւորացն,
Որք աւետիս տային կանանց,
Թէ մահ լուծաւ մահկանացուաց.
Սա, որ մահու Քո տնկակից,
Լիցի կենացդ հաղորդակից.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Պարակցեալ անմարմնականքն
Առ կենսատու սուրբ գերեզմանն՝
Տան աւետիս ազգի մարդկան
Վասն կենացն յաւերժական.
Դասաւորեա՛ պարուց նոցին
Զննջեցեալս յօրն վերջին.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Ջահաւորեալ նշան խաչին
Յարեւելից փայլեալ ծագին,
Հաւատացեալքն ի Քեզ բերկրին,
Եւ ուրացողքն կոծեսցին.
Զերկրպագուս սրբոյ խաչին
Պայծառացո՛ լուսով նորին.
Լի լապտերօք մո՛յծ յառագաստ
Ընդ իմաստուն սուրբ կուսանացն:
Արարի՛չ եւ մարդասէ՛ր,
Անոխակա՛լ եւ բարեգո՛ւթ,
Որ գովիսդ ի սրովբէից,
Տէ՛ր դատաւոր արդարութեան,
Ընդ սրբոց առաքելոց,
Տէ՛ր, պսակեա՛ զմեր ննջեցեալսն.
Ողորմա՛ծ Տէր, ողորմեա՛
Հոգւոցն մեր ննջեցելոց:
Հոգւոցն հանգուցելոց, Քրիստո՛ս Աստուած, արա՛ հանգիստ եւ ողորմութիւն. եւ մեզ՝ մեղաւորացս, շնորհեա՛ զթողութիւն յանցանաց:
Եւ եւս խաղաղութեան զՏէր աղաչեսցուք:
Վասն հանգուցեալ հոգւոցն աղաչեսցուք զՓրկիչն մեր Քրիստոս, զի զնոսա ընդ արդարսն դասեսցէ եւ զմեզ կեցուսցէ շնորհիւ ողորմութեան Իւրոյ:
Ամենակալ Տէր Աստուա՛ծ մեր, կեցո՛ եւ ողորմեա՛:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
ԱՂՕԹՔ
Քրիստոս Որդի՛ Աստուծոյ, անոխակա՛լ եւ բարեգո՛ւթ, գթա՛ Քո արարչական սիրովդ ի հոգիս հանգուցեալ ծառայից Քոց: Յիշեա՛ յաւուր մեծի գալստեան արքայութեան Քո: Արա՛ արժանի ողորմութեան, քաւութեան եւ թողութեան մեղաց: Դասաւորեալ պայծառացո՛ ընդ սուրբս Քո յաջակողմեան դասուն, զի Դու ես Տէր եւ Արարիչ ամենեցուն, Դատաւոր կենդանեաց եւ մեռելոց. եւ Քեզ վայելէ փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:
Օրհնեալ Տէր մեր Յիսուս Քրիստոս. ամէն:
Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն:
Քրիստոս Աստուա՛ծ մեր, անճառելի տէրութեանդ շնորհիւ եւ բարեխօսութեամբ օրհնաբանեալ անարատ ծնողիդ՝ սրբուհւոյ Աստուածածնին եւ միշտ Կուսին, լուսաւորեալ պայծառացո՛ զհոգիս համօրէն հաւատացելոց, յուսով ի Քեզ ննջեցելոց, եւ այնոցիկ, որք ընդ հովանեաւ սրբոյ տաճարիս են հանգուցեալ:
Երանելի սո՛ւրբ առաքեալք՝ հրաւիրեալք ի սկզբանէ եւ ընտրեալք յորովայնէ, սպասաւո՛րք եւ բարեկա՛մք եւ վկա՛յք Աստուածորդւոյն, բարեխօսեցէ՛ք առ Տէր վասն անձանց մերոց:
Որք առիք իշխանութիւն ի վերայ ազգի մարդկան՝ կապել եւ արձակել ի յերկինս եւ ի յերկրի, արձակեցէ՛ք զմեզ ի կապանաց մեղաց մերոց:
Խաչակցեա՛լք ընդ Քրիստոսի եւ ընդ Նմին թագաւորեա՛լք, ի միւսանգամ գալստեան Նորա նստելոց էք դատաւորք. թողութի՛ւն շնորհեցէք եւ մեզ՝ մեղաւորացս:
(Օրհ. Համօրէն առաքելոց գձ. Բ.)
Զորս առեալ ի ծովակէն՝ արարեր որսորդս մարդկան՝ որսալ զամենեսեան յարքայական սեղանն, բարեխօսութեամբ սոցա, Քրիստո՛ս, խնայեա՛ ի մեզ:
Որոց հրամայեցեր հոտ անոյշ լինել ընդ տիեզերս՝ ոմանց հոտ ի մահուանէ ի մահ եւ ոմանց ի կենաց ի կեանս, բարեխօսութեամբ սոցա, Քրիստո՛ս, խնայեա՛ ի մեզ:
Որոց խոստացար նստիլ յաթոռ դատողական՝ դատել զազգն Իսրայելի յայնմ աւուր յահեղին, բարեխօսութեամբ սոցա խնայեա՛ ի մեզ:
(Օրհ. Համօրէն առաքելոց գձ. Գ., 1-2 տներ)
Զառաջնորդս եւ զվարդապետս Եկեղեցւոյ Քում սրբոյ յիշատակաւ պատուեմք այսօր. բարեխօսութեամբ սոցա խնայեա՛ ի մեզ:
Ժիր մշակք անպարտելի կաթուղիկէ Եկեղեցւոյ եւ պսակ պարծանաց հաւատացելոց. բարեխօսութեամբ սոցա խնայեա՛ ի մեզ:
(Տրյ. Յովհաննու Մկրտչին գձ.)
Առաքեալն յԱստուծոյ կարապետ՝ մեծն ի մարգարէս մկրտիչն Յովհաննէս, պատրաստէր ճանապարհս Թագաւորին յաւիտենից:
Վկայեաց եւ ասէ. «Չեմ ես Քրիստոսն, այլ առաքեալ եմ առաջի Նորա. եւ հարսին Եկեղեցւոյ Փեսայ Քրիստոս է՝ Արքայն երկնից»:
Տեսանէր զՅիսուս, զի գայր առ նա, աղաղակեաց եւ ասէ. «Ահա Գառն Աստուծոյ, որ եկն ի բառնալ զմեղս աշխարհի»:
(Մնկ. Սրբոյն Գրիգորի Լուսաւորչին մտանելոյն ի վիրապն գձ.)
Այսօր տօնէ Եկեղեցի ուրախութեամբ զյիշատակ սրբոյն Գրիգորի, որով լուսաւորեալ պայծառացաւ վայելչապէս՝ ի հանդերձս յոսկեհուռս զարդարեալ եւ պսակեալ. օրհնեցէ՛ք, մանկո՛ւնք, զՔրիստոս Թագաւորն:
Այսօր ցնծան նորածնեալ որդիք լուսոյ յիշատակաւ սուրբ Լուսաւորչին, որով հրաւիրեցան ի հարսանիսն անապական՝ մտանել ընդ Փեսային երկնաւորի ի յառագաստն լուսեղէն. օրհնեցէ՛ք, մանկո՛ւնք, զՔրիստոս Թագաւորն:
Այսօր քահանայք՝ հոգեւոր պատարագին սպասաւորք, վերապատուեն զքահանայապետն սուրբ, որով երկնայնոց քահանայութեանցն հաղորդեալք, յոր վերափոխեալ՝ այսօր մտանէ ի սրբութիւն սրբոց՝ միշտ բարեխօսել առ Տէր վասն մեր. օրհնեցէ՛ք, մանկո՛ւնք, զՔրիստոս Թագաւորն:
(Օրհ. Սրբոց հայրապետացն գձ. Բ.)
Ժողովեալ սուրբ հայրապետքն հրաւիրմամբ Հոգւոյն Սրբոյ՝ վերստին հաստատեցին զառաքելական քարոզութիւնն ի վերայ վիմի հաւատոյ հիման սուրբ Եկեղեցւոյ:
Որք զինու Հոգւոյն Սրբոյ արիաբար պատերազմեալք՝ վանեցին զընդդիմամարտ մոլութիւն հերձուածողացն, որպէս հովիւքն քաջք հերքեցին զգայլսն ի հօտէ գառանց:
Եւ զհաւատս ճշմարիտս Սուրբ Երրորդութեանն ընդհանուր քարոզեցին յԵկեղեցիս ուղղափառաց՝ հաւատալ ի Հայր եւ յՈրդի եւ յԱմենասուրբ Հոգի:
(Մնկ. Սրբոց Ոսկեանց գձ.)
Որք արժանաւորեցայք կոչիլ յաշակերտութիւն առաքելոյն Թադէոսի եւ աստուածային հրով մաքրութեան՝ ոսկի փորձեալ գտայք ի բնակարանս հրեշտակաց, ո՛վ երանելի սուրբ Ոսկեանք, բարեխօսեցէ՛ք առ Տէր մաքրել զմեզ ի մեղաց մերոց:
Որք անհրաժեշտ դաւանութեամբ քարոզեցիք զՔրիստոս ի դրունս թագուհւոյն՝ մկրտելով զքաջ նահատակսն ի յակունս Եփրատայ ի ծաղկազարդ վայելչութիւնսն, ո՛վ երանելի սուրբ Ոսկեանք, բարեխօսեցէ՛ք առ Տէր մաքրել զմեզ ի մեղաց մերոց:
Որք անպատմելի մնացիք ի հրապուրանաց որդւոյ թագաւորին՝ չարչարեալք վասն Քրիստոսի, արագապէս խողխողեցայք պատարագ ընդունելի, ո՛վ երանելի սուրբ Ոսկեանք, բարեխօսեցէ՛ք առ Տէր մաքրել զմեզ ի մեղաց մերոց:
(Օրհ. Հոգեգալստեան Դ աւուր գձ. Բ.)
Որ համագոյդ ես Հօր եւ Որդւոյ, անճառաբար Բղխո՛ւմն ի միշտ Էէն, այսօր բղխեցեր ջուր կենդանի յԵրուսաղէմ. Հոգի՛ Աստուծոյ, ողորմեա՛:
Որ արարչակից ես Հօր եւ Որդւոյ, Որով կենդանածնեալք ի ջուրս արարածք, այսօր որդիս Աստուծոյ ծնանիս ի ջուրց, Հոգի՛ Աստուծոյ, ողորմեա՛:
Որ փառակից ես Հօր եւ Որդւոյ եւ քննես զխորս Աստուծոյ, այսօր խորագէտս իմաստից զյիմարս աշխարհի արարեր. Հոգի՛ Աստուծոյ, ողորմեա՛:
(Տրյ. Հանգստեան գձ. Զ.)
Յահաւոր Քո գալստեանն, յորժամ գաս, Տէ՛ր, ի յերկնից աստուածային Քո զօրութեամբդ, եւ նշան սուրբ խաչին պայծառանայ ի մէջ երկրի։
Նորոգին տարերք երկրի ի ձայնէ հնչման փողոյն, որ գոչէ զկենդանութիւն. ասէ. «Արի՛ք, եկն Տէր կենդանեաց եւ մեռելոց»։
Շնորհեա՛ մեզ, Տէ՛ր, ողորմութիւն ի ծագել սրբոյ խաչին, որով եղեւ մեզ փրկութիւն, զի նովաւ ելցուք ընդ առաջ Աստուածորդւոյն, որ ի յերկնից։
(Օրհ. Սուրբ Ծննդեան Ե աւուր գձ. Բ.)
ԶԾնեալն ի սրբոյ Կուսէն ընկալցուք ի սիրտս մեր հաւատով, որպէս երբեմն ի գիրկսն Սիմէոն :
Օրհնեսցուք զԱռաքեալն ի Հօրէ, որ ի խանձարուրս պատեցաւ վասն մեր եւ փրկեաց զմեզ յանիծիցն Ադամայ:
Ուրա՛խ լեր, անապա՛տ ծարաւի եւ ծաղկեա՛ հաւատով երանութեամբ յայսմ հետէ, քանզի Քրիստոս յոյս յայտնեցաւ հեթանոսաց:
(Օրհ. Վարդավառի Գ աւուր գձ. Ա.)
Այսօր, որ էն ի յերկինս՝ Բան եւ Ծնունդ Հօր Միածին, զծածկեալն ի յէից խորհուրդ յայտնեաց աշակերտացն՝ ծառայի զկերպարանն ծածկելով Աստուածութեամբն:
Այսօր հնչեաց յառաքեալսն հայրական բարբառ յերկնից, ասէ. «Դա է Որդի Իմ սիրելի, ընդ Որ հաճեցայ», որ զբնութիւնն աստուածային կերպիւ ծածկեալ ծառայական:
Այսօր վիմին հաւատոյ յայտնեալ զխորհուրդ Երրորդութեանն երրակի յօրինմամբ տաղաւարացն խորհրդոյ, որում զմեզ մաքրեսցես՝ լինել տաճար Երրորդութեանն:
Փա՜ռք Հօր եւ Որդւոյ եւ Հոգւոյն Սրբոյ այժմ եւ միշտ եւ յաւիտեանս յաւիտենից. ամէն:
(Օրհ. Համօրէն առաքելոց գձ. Գ., 3-րդ տուն)
Հազարապե՛տք աստուածային խորհրդոցն եւ բացո՛ղք դրան արքայութեան երկնից, բարեխօսեցէ՛ք առ Տէր վասն անձանց մերոց:
(Օրհ. Համօրէն առաքելոց գձ. Ա.)
Բարեխօսութեամբ սրբուհւոյ Աստուածածնին եւ Յովհաննու Մկրտչին, սրբոյն Ստեփանոսի Նախավկային եւ սրբոյն Գրիգորի մերոյ Լուսաւորչին, յիշատակաւ եւ աղօթիւք սրբոց առաքելոցն եւ առաջին լուսաւորչացն մերոց Թադէոսի եւ Բարդուղիմէոսի, որոց այսօր է յիշատակ, եւ վասն խաչի Քո պատուականի, Տէ՛ր, ընկա՛լ զաղաչանս մեր եւ կեցո՛ զմեզ:
(ԱԿ, ԳԿ)
Վասն ուղղելոյ զգնացս մեր ի ճանապարհս խաղաղութեան զՏէր աղաչեսցուք:
Տէ՛ր, ողորմեա՛:
Վասն ցրելոյ ի մէնջ զամենայն խորհուրդս չարին զՏէր աղաչեսցուք:
Տէ՛ր, ողորմեա՛:
Վասն պարգեւելոյ մեզ առողջ խորհուրդս եւ առաքինի վարս զՏէր աղաչեսցուք:
Տէ՛ր, ողորմեա՛:
Վասն պահելոյ զմեզ ընդ հովանեաւ ամենազօր աջոյն Իւրոյ զՏէր աղաչեսցուք:
Տէ՛ր, ողորմեա՛:
Վասն խորտակելոյ զհակառակորդն վաղվաղակի ընդ ոտիւք մերովք զՏէր աղաչեսցուք:
Տէ՛ր, ողորմեա՛:
Վասն հոգւոցն հանգուցելոց, որք ճշմարիտ եւ ուղիղ հաւատով ի Քրիստոս ննջեցին, զՏէր աղաչեսցուք:
Յիշեա՛, Տէ՛ր, եւ ողորմեա՛:
Եւ եւս միաբան վասն ճշմարիտ եւ սուրբ հաւատոյս մերոյ զՏէր աղաչեսցուք:
Տէ՛ր, ողորմեա՛:
Զանձինս մեր եւ զմիմեանս Տեառն Աստուծոյ ամենակալին յանձն արասցուք:
Քեզ՝ Տեառնդ, յանձն եղիցուք:
Ողորմեա՛ց մեզ, Տէր Աստուա՛ծ մեր, ըստ մեծի ողորմութեան Քում. ասասցուք ամենեքեան միաբանութեամբ:
Տէ՛ր, ողորմեա՛, Տէ՛ր, ողորմեա՛, Տէ՛ր, ողորմեա՛:
ԱՂՕԹՔ
(ԱԿ, ԳԿ)
Տէ՛ր երկնի եւ երկրի, Արարի՛չ ամենայն արարածոց՝ երեւելեաց եւ աներեւութից, առ Քեզ կարդամք յամենայն ժամ, զի ընդ ամենայն տեղիս է տէրութիւն Քո, եւ արքայութիւն Քո ամենեցուն տիրէ: Շնորհեա՛ մեզ երկիւղիւ ի պաշտօն Քո կանխել հանապազ, սիրել զՔեզ ի բոլոր սրտէ եւ ի բովանդակ մտաց եւ յամենայն զօրութենէ մերմէ պահել զպատուիրանս Քո, համբառնալ առ Քեզ զձեռս մեր ի սրբութիւն՝ առանց բարկութեան եւ երկմտութեան, եւ գտանել ի Քէն զշնորհս եւ զողորմութիւն եւ զառաքինասէր գործոցն յաջողութիւն: Վասն զի Դու ես Տէր կենաց եւ Աստուած ողորմութեանց, եւ Քեզ վայել է փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. ամէն:
Խաղաղութի՜ւն ամենեցուն: Աստուծոյ երկրպագեսցուք:
Քում ամենազօր եւ յաղթող տէրութեանդ կրկնի ամենայն ծունր յերկրպագութիւն, եւ փառաւորի յամենեցունց թագաւորութիւն Քո: Նայեա՛ յերկրպագութիւնս մեր եւ ուսո՛ մեզ առնել զարդարութիւն ճշմարտութեան: Վասն զի Դու ես Աստուած խաղաղութեան, որ բարձեր զթշնամութիւն ի միջոյ եւ արարեր զխաղաղութիւն յերկինս եւ յերկրի, հեռաւորաց եւ մերձաւորաց աւետարանեցեր զնոր պարգեւս Քոյին բարեացդ. որում եւ զմեզ մեծի շնորհացդ արժանաւորս արասցես՝ դասելով ընդ ճշմարիտ երկրպագուս Քո, Աստուա՛ծ մեր եւ Տէ՛ր մեր եւ Փրկիչ Յիսուս Քրիստո՛ս, որ ես օրհնեալ ընդ Հօր եւ ընդ Սուրբ Հոգւոյդ այժմ եւ միշտ եւ յաւիտեանս յաւիտենից. ամէն:
Թագաւոր յաւիտեան:
Զճգնութիւն սրբոց առաքելոցն եւ առաջին լուսաւորչացն մերոց Թադէոսի եւ Բարդուղիմէոսի բարեխօս ունիմք առ Քեզ, Քրիստո՛ս: Եւ աղաչեմք սոքօք. շնորհեա՛ զթողութիւն յանցանաց մերոց եւ ի կեանսդ յաւիտենից նորոգեա՛ եւ կեցո՛:
Կցորդ սաղմոս.
Ոչ են բանք, եւ ոչ են խօսք, որոց ոչ լսին ձայնք նոցա: Ընդ ամենայն երկիր ել բարբառ նոցա, եւ մինչեւ ի ծագս աշխարհի են խօսք նոցա: Աղաչանօք սրբոց առաքելոցն եւ առաջին լուսաւորչացն մերոց Թադէոսի եւ Բարդուղիմէոսի զպաղատանս մեր մի՛ անտես առներ, որ միայնդ ես բազումողորմ, Թագաւո՛ր փառաց Քրիստոս:
Փոխ.
Նահատա՛կք եւ վկա՛յք Քրիստոսի Աստուծոյ, ընդհանուր տիեզերաց քարո՛զք փրկութեան, որք զանձինս ձեր մատուցիք պատարագ եւ զենումն Աստուծոյ Հօր ի հոտ անուշից. ժողովելոցս ի կատարել զյիշատակ անուան ձերոյ բարեխօսեցէ՛ք առ Տէր վասն քաւութեան մեղաց մերոց:
(ԱԿ, ԳԿ)
Յերգս օրհնութեան եւ ի ձայն սաղմոսաց անդադար փառաւորեմք զՀայր եւ զՈրդի եւ զՍուրբ Հոգիդ այժմ եւ միշտ եւ յաւիտեանս յաւիտենից. ամէն:
Օրհնեալ Տէր մեր Յիսուս Քրիստոս. ամէն:
Հա՛յր մեր, որ յերկինս ես, սուրբ եղիցի անուն Քո: Եկեսցէ արքայութիւն Քո: Եղիցին կամք Քո որպէս յերկինս եւ յերկրի: Զհաց մեր հանապազորդ տո՛ւր մեզ այսօր: Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց: Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէ: Զի Քո է արքայութիւն եւ զօրութիւն եւ փառք յաւիտեանս. ամէն: